مساء الخير على احلى بناات فى الدنيا
بدون مقدمات.......
يا أخوانا انتوا مش ملاحظين ان الكلام العاطفى والتعبيرات الرومانسية زادت اوى اليومين دول
دى مش زادت دى كترت أوى يعنى
حبيب قلبى,, روحى,, نور عينى,, واحشنى يا غالى,, انت فينك يا قمر,, والنعمة الشريفة بموت فيك,,
الكلام الحو ده كله مكنش فى قاموسنا اليومى قبل كده
والكلام ده مش بيقولوا راجل لست او ست لراجل
لا راجل لراجل وست لست واى حد ممكن تقابله يقوم رازعك طقم حنية كده من غير اى مناسبة
وساعات من غير سابق معرفة
الشىء الغريب ان شلال الكلام الحلو ده وتعبير الحب الفظيع ده
جاى فى وقت الحب فيه انتهى تماما والناس مبقتش طايقة بعضها
والحقيقة ثورة الاتصالات والموبايلات اخترعتلنا وسائل جديدة للتعبير عن الحب
رنات ومسجات جاهزة يا دوب تتدوس سند ووصلت يا باشا
وكلنا طبعا فاكرين عبد الحليم حافظ ولبنة عبد العزيز فى الوسادة الخالية
ومكالمات التليفون اللى كانت شغالة بينهم طول الليل
ولبنة بتقوله بصوتها اللى يدوخ ( اقفل بقى يا صلاح )
وصلاح مش عاوز يقفل
كانت بتقول ياصلاح بطريقة خاللتنى اروح السجل المدنى عشان اغير اسمى
كان نفسى يبقى اسمى صلاح من حلاوة صلاح اللى بتقولها
وطبعا عبد الحليم ولبنى كانوا بيتكلموا بالساعات من غير اى مشاكل
عشان مصلحة التليفونات ايامها كانت بتدى فلوس للى يتكلموا فى التليفون
عشان يشجعوا الناس تتكلم
هنستعرض لبعض قاموس لالفاظ عاطفية جديدة دخلت حياتنا بعد ظهور الموبايل
تلاقى اللى بتكلمك فى نهاية المكالمة بتقولك يالا باى
ايه يالا باى كانها مش قادرة تسيبك انما يالا باى يالا باى
وبعدين طلعت حاجة جيدة سى يووو بقى ايه سى يووو دى
خدوا دى جديدة برده فى نهاية المكالمة بعد يالا باى وسى يو والحاجات دى
وفجاة قبل مهبد السماعة فى وشها الاقيها بتقولى تيك كير بقى تيك كير
ايه تيك كير دى هى بتكلمنى وانا بتسلق جبل المقطم وخايفة اصل اقع على جدور رقبتى ما تقول كده فى المطلق خللى بالك من نفسك طيب اتييك كير من ايه
ظاهرة تانية دى غيظانى شوية لو بتتصل بى واحدة وارد عليها واقول الو
تقوم هى مخضوضة على طول وتقولى مالك صوتك مش عاجبنى طمنينى عليكى
انا مقولتش غير الووو
احلفلها انى كويسة جدا ومفيش اى حاجة
وطبعا هى مش مصدقانى فكرانى مخبية عليها الموصيبة اللى انا واقعة فيها
بليز قوليلى متخبيش علىّ حاجة
ايه القصة يا جماعة والنعمة مافيه اى حاجة
ولازم طبعا اجارى مشاعرها عشان هى مخضوضة لازم يكون عندى انا كمان حاجة تخض
امال اسيبها تتخض عالفاضى كده
مفيش اصلى عندى بس شوية انفلوانزا تقوم مصرخة مع انى كنت بطمنها
ومروحتيش للدكتور لحد دلوقتى انتى لازم تعملى تشيك اب لا يمكن
الولية دى بتصوت على مين
انا بقولها عندى انفلوانزا عادى مش انفلوانزا الطيور
وعلى كده على طول بقيت شايفة اللى حواليا نازلين حب فى بعض وخوف على بعض
كل الكلام حلو كل الاحضان دافئة كل اللقاءات سبايسى
لدرجة ان احنا مش مكفينا عيد حب واحد فى السنة
عندنا اتنين فلانتين واحد فى فبراير وواحد فى نوفمبر
امال نودى الحب اللى عندنا ده كله فين
وفى الافراح تلاقى المعازيم نازلين رقص وزراغيت
والعروسة والعريس فى منتهى السعادة بحب الناس
بس قربى انتى ساعتدك جمب اى طربيزة ولمع الاوكر (اسمع يعنى)
هتلاقى اللى قاعدين نازلين تقطيع فى فروة العريس والعروسة واهلهم
ولو دخلتى عزى تلاقى المعزيين نازلين عياط ونهنهة
لدرجة انك ساعدتك متعرفيش اللى مات ده اصلا قريب مين
قربى كده شوية ولمعى الاوكر تلاقى اللى كانت حاطة راسها فى ايدها ونازلة نهنهة
بتقول للى جنبها سمعتى اخر نكته وشفتى فلانة عملت ايه
حب حب حب ........
فى كل حته حب فى الكافيهات فى الشارع فى النوادى فى المصالح الحكومية
مش شايفة قدامى غير عشاق ونظرات وتسبيل وعواطف
يارب شوية كراهية بقى الحب مالى البلد
اعزائى الاعضاء بحبكم جدا عضوة عضوة
وحتى اللى مش مشتركين ودخلين لأول مرة بحبهم جدا انا مش قادرة اوصفلكم بتوحشونى قد ايه من موضوع لموضوع
عموما انا مش هنام لحد بكره لغاية منتقابل
يالا باى سى يووو تيك كير بقى تيك كير بليز اعملوا اتشيك اب عشان انا قلقانة عليكوا صوتكم مش عاجبنى خالص
يارب الموضوع يعجبكم
مستنيا ردودكم هل الكلام ده بيقابلكم ولا لأ
سى يووو بقى وتيك كييييير
موضوع: الرومانسية والكلام العاطفى 
